San Anton
San Anton mendiaren gain-gainean dago, non oraindik ikus daitezkeen Erdi Aroan sua pizteko erabilitako talaia dorrearen zimenduak. Itsas mailaren gainetik 93 m-ra dagoen itsasargi honek hainbat eraso pairatu du gerretan. Adibidez, 1813an, Independentzia gerran frantsesek leherrarazi zutenez, itsasargia denbora puska batez itzalita geratu zen.
Ingurumarian denetariko landareak aurki daitezke, hala nola pinuak, akaziak, tamarindoak, hortentsiak. Dorrea 14 m garai da, zortzi angelukoa, zeinaren gainean bi solairu biribil eraiki diren, eta hauexen gainean dago linterna zuria. Haize-orratza dauka, bai eta Faraday kaiola ere, eta tximist-orratz sistema berezia era bai, 1870ean pairatutako ekaitz elektriko izugarriaren ondoren paratua. Gaur egun argikuntza sistema birakari automatizatua darabil, 15 segundoan behin launa distira zuri emititzen dituena, 21 milia luze.
Getaria arrantzale herri jatorrak badu bisitatzeko moduko erakargarri asko, besteak beste, Euskal Herriko monumentu gotikorik ederrenetarikoa den Salbatore eliza. Izan ere, XIV eta XV. mendeetan eraikitako eliza hau Monumentu Nazional izendatua da 1895az geroztik. Getariako kale nagusienetako bat, Katrapona izeneko pasabidean, haren azpitik igarotzen da, eliza behiala harresien partaide zen eta. Salbatoreren ezaugarri artistikoez gain, garrantzi historiko handiko tokia ere bada, zeren eta bertan ospatu baitziren, 1397an, Gipuzkoako lehendabiziko Batzar Nagusiak, alegia, gaur egungo Gipuzkoa lurralde historiko gisa instituzionalki osatzen hasi zeneko lehen bilkura.
Aipagarria ere bada Joan Sebastian Elkano nabigatzaile ospetsua, getariarra berau, eliza honetan bataiatua izan zela.
Lokalizazioa
Argazkiak